డాక్టర్
అరాన్హ.. ఆ అమ్మాయిని ఏకదీక్షతో చూస్తున్నాడు. " పేరును బట్టి మిమ్మల్ని
ఉత్తరాదివారు అనుకున్నాను డాక్టర్. మీరు ఉగాది వారు అన్నమాట" అంది పూర్ణిమ.
మనస్ఫూర్తిగా నవ్వాడు అరాన్హ. ఏప్పుడో గాని ఆయన అలా నవ్వడు. 'ఉగాది వారు' అన్న
విరుపు ఆయనకు నచ్చింది. " నేను తెలుగువాణ్ణే. మా పూర్వీకులు ఎవరో పోర్చుగీస్
లో ఉన్నారట. అరాన్హ అంటే స్పైడర్ అని అర్థం." అన్నాడు డాక్టర్ అరాన్హ.. అదే
నవ్వుతో. "ఓ.. అయితే మీరు తెలుగు స్పైడర్ మేన్!".. నవ్వింది పూర్ణిమ.
పూర్ణిమ మెంటల్ కండిషన్ పర్ ఫెక్ట్ గా ఉందని ఆయనకు అర్థమైంది. అయినా గాని
అడిగాడు.." చెప్పండి పూర్ణిమా.. ఏంటి మీ ప్రాబ్లం?" పని. " నేను
చెప్పానా డాక్టర్.. నాకేదో ప్రాబ్లెమ్ ఉందని!" ఆశ్చర్యంగా ముఖం పెట్టింది
పూర్ణిమ.
పాతికేళ్ళకు అటూఇటుగా వుంటుంది ఆమె వయస్సు. అందంగా ఉంది. చలాకీగా
ఉంది." మీరు చెప్పలేదు మిస్ పూర్ణిమా... మీ వాళ్ళు చెప్పారు.. మీరేదో
సైకలాజికల్ డిజార్డర్ తో బాధపడుతున్నారని" అన్నాడు అరాన్హ. పూర్ణిమ ఇబ్బందిగా
చూసింది. " మిస్ పూర్ణిమ కాదు.
మిసేస్ పూర్ణిమ" అని చెప్పింది. " అండ్.. సైకలాజికల్ డిజార్డర్
బాధపడుతుంది నేను కాదు. నాకేదో సైకలాజికల్ ప్రాబ్లం ఉందని నన్ను మీ దగ్గరకు
తీసుకోచ్చినవాళ్ళు.." అంది. " ఎందుకు వాళ్ళలా మీ గురించి అనుకుంటున్నారు
మిసెస్ పూర్ణిమ" అన్నాడు అరాన్హ. " నా హస్బెండ్ చనిపోయాడు. ఆయనే
తలుచుకుని తలుచుకుని బాధపడుతున్నానని అలా అనుకుంటున్నారు. తలచుకుని బాధ పడడం బాధే
అవుతుంది తప్ప ప్రాబ్లం అవుతుందా! చెప్పండి డాక్టర్?".. అడిగింది పూర్ణిమ
ఆవేదనగా. " మీరన్నది నిజమే పూర్ణిమా. తలచుకుని బాధ పడడం బాధ అవుతుంది తప్ప
ప్రాబ్లం అవదు" అన్నాడు అరాన్హ. పూర్ణిమ నవ్వింది. "ట్రూ.. డాక్టర్.
తలచుకునే అవసరాన్ని నా భర్త నాకు రానివ్వలేదు. ఆయన చనిపోయి కొన్ని రోజులైనా
కానప్పుడు ఆయన చనిపోయిన మనిషి ఎలా అవుతారు? అలాంటప్పుడు నేను ఆయన తలచుకోవడం అంటూ
ఉంటుందా!" " దెన్", మీవాళ్లు అంటున్న తలుచుకోవడం ఏంటి?"
అన్నాడు అరాన్హ. " నాకు అదే అర్థం కావడం లేదు డాక్టర్. నేను వాళ్లకు క్లియర్
గానే చెప్తున్నాను.
సూర్య ఇవాళ నాతో మాట్లాడాడు. సూర్య ఇవాళ ఆకలవుతుంది త్వరగా
అన్నం పెట్టు పూర్ణిమా" అని అడిగాడు. సూర్య ఇవాళ..' ఈ చీరలో నువ్వు చాలా
బాగున్నావు" అన్నాడు.. అని ఎప్పటికప్పుడు చెబుతూనే ఉంటాను. అయితే అదంతా కూడా
నేను సూర్యను 'తలచుకోవడం' అనే అనుకుంటున్నారు" అంది పూర్ణిమ. " నేనుా
అలాగే అనుకుంటున్నాను మిసస్ పూర్ణిమా. చనిపోయిన మనిషి మాట్లాడడం, అన్నం పెట్టు అని
అడగడం, నువ్వీ చీరలో బాగున్నావు " అని కాంప్లిమెంట్ ఇవ్వడం.. ఇవన్నీ కూడా
తలుచుకోవడమే. సైకాలజీలో దీనికి ఇంకో పేరు లేదు. " బ్రాంతి" అనొచ్చు. కానీ,
మీ విషయంలో దాన్ని ప్రేమ అనాలి" అన్నాడు డాక్టర్ అరాన్హ. తను
చెప్పదలుచుకున్నది ఇంకా మొదలుపెట్టకుండానే ఒక్కసారిగా ఏడ్చేసింది పూర్ణిమ! పూర్ణిమ
కనుక ఎమోషనల్ అయిపోకుండా ఉంటే డాక్టర్ అరాన్హ మొదలు పెట్టదలుచుకున్న విషయం వేరే
ఉంది. మొదట ఆమెకు ఆయన ఒక జోక్ చెప్పి నవ్వీంచాలనుకున్నాడు. నవ్వించడం ఆయన ఉద్దేశం
కాదు. ప్రతిదానికి ఒక లాజిక్ ఉంటుందని చెప్పండి. లాజిక్ లేకుండా దెయ్యం కూడా
ఉండదని చెప్పండి. అయితే ఇప్పటికీ ఆ జోక్ ని ఆమెకి చెప్పకూడదనే అనుకున్నాడు. కేవలం
లాజిక్ గురించి మాట్లాడాలనుకున్నారు. " దెయ్యాలు లేవని చెప్పడానికి ఎంత లాజిక్
ఉంటుందో, ఉందని చెప్పడానికి అంతే లాజిక్ ఉంటుంది మెసేస్ పూర్ణిమా" అన్నాడు
అరాన్హ. " దెయ్యం అని మీరు ఎవరిని అంటున్నారు డాక్టర్" అంది పూర్ణిమ,
కళ్ళు తుడుచుకొంటూ. " ఒకవేళ నా భర్త నాకు పట్టడం జరిగితే, అది దెయ్యం పట్టడం
అవదు. ఆత్మ పట్టడం అవుతుంది. అయితే.. పట్టడానికి ఆయన ఆత్మ కూడా కాదు డాక్టర్. రోజు
నేను ఆయన్ని స్పష్టంగా చూస్తున్నాను. మాట్లాడుతున్నాను. ఆయన వాడే పెర్ ఫ్యూమ్ ని
కూడా ఫీలవుతున్నాను" అంది పూర్ణిమ. " స్ర్టేంజ్" అన్నాడు అరాన్హ.
'షిట్' అని మాత్రం మనసులో అనుకున్నాడు. " వెళ్తాను డాక్టర్. మా వాళ్లకు మీరేం
ట్రీట్ మెంట్ ఇస్తారో ఇవ్వండి" అని, నవ్వుతూ కుర్చీలోంచి లేచింది పూర్ణిమ.
అరాన్హ కూడా ఆమెతోపాటు లేచాడు. " మీకో జోక్ చెప్పమంటారా డాక్టర్" అంది
పూర్ణిమ సడన్గా. ఆశ్చర్యంగా చూశాడు అరాన్హ.
'ఒక యంగ్ లేడీ కి ముంబైలో ఉద్యోగం
వచ్చింది. ఒంటరిగానే వెళ్లి ఉద్యోగంలో చేరింది. అక్కడ మంచి ఇంటిని కూడా తనే
వెతుక్కుంది. ఆ తర్వాత భర్తకు ఎస్ఎంఎస్ పెట్టింది. అయితే ఆ ఎస్ఎంఎస్ పొరపాటున
భర్తకు బదులుగా వేరొకరికి వెళ్ళింది. ఆ వేరొకతను అప్పుడే తన భార్యకు అంతిక్రియలు
చేసి ఇంటికి వచ్చాడు. తనకు వచ్చిన ఎస్ఎంఎస్ ను చదివి స్పృహ తప్పి పడిపోయాడు! వెంటనే
ఆయన్ని దగ్గర్లోని హాస్పిటల్ లో అడ్మిట్ చేశారు. ఇంతకీ ఆ ఎస్ఎంఎస్ లో ఏముంది?!
'నేను క్షేమంగా చేరాను. ఇక్కడ ఉండేందుకు అనుకూలమైన చోటు దొరికింది. నా గురించి
బెంగ పెట్టుకోకు. వీలైతే ఒకట్రేండు రోజుల్లో మిమ్మల్ని తీసుకెళ్తా.." ఇట్లు
మీ భార్యామణి." డాక్టర్ అరాన్హ అదిరిపడి చూశాడు పూర్ణిమ వైపు. పూర్ణిమకు
అంతకు క్రితమే అతడు చెప్పాలనుకున్న జోక్ అది! " ఎలా తెలుసు మికీ జోక్..
విసెస్ పూర్ణిమా!" అని అడిగాడు. పూర్ణిమ నవ్వింది. " రాత్రి.. నేను నా
భర్త మాట్లాడుకుంటూ ఉంటే, ఆయనే చెప్పారు నాకు.. నేను మీ దగ్గరకు వస్తే మీరు ఈ జోక్
ని నాకు చెప్తారని. ఈరోజు రాత్రి మళ్లీ మేము కలుసుకున్నప్పుడు ఆయనకి చెప్పాలి.
నేనే మీకు ఈ జోక్ ని చెప్పానని" అంటూ క్లీనిక్ బయటకు వచ్చేసింది పూర్ణిమ.
లోపల ఎవరో 'దబ్' మనీ పడిపోయిన చప్పుడు ఆమె వినిపించలేదు.
ఇంకో పేరు లేదు
Reviewed by Smartbyte group
on
August 29, 2018
Rating:

No comments: