నా చావు నే చస్తా

                     శుభం! సినిమా ముగిసింది. 'నా సావు నే సస్తా. నీకెందుకు?'.. సినిమాలోని డైలాగ్. ఎవరో పకపక మంటున్నారు. డిమ్ లైట్లలో కొద్దికొద్దిగా కదులుతూ 'ఎగ్జిట్' వైపుకు మెట్లు దిగుతున్నారు తాత, మనవడు. పదేళ్లు ఉంటాయి మనవడికి. తాత చేయి పట్టుకొని ఒక్కో అడుగు వేస్తున్నాడు. చూసిన సినిమాపై లేదు వాడి ధ్యాస, చూడబోయే 'స్కేరీ హౌస్' మీద ఉంది. మల్టీఫ్లెక్స్ అది. నాలుగైదు స్క్రీన్లు, చిన్న షాపింగ్ మాల్, కిడ్స్ ప్లే జోన్, స్కేరీ హౌస్.. ఇలాంటివన్నీ ఉన్నాయి. ధియేటర్ లోపలికి వెళ్లే ముందే మాట తీసుకున్నాడు మనవడు. " తాత.. సినిమా అయిపోయాక స్కేరీ హౌస్ కి వెళ్ళాలి" అని. తాతగారు నవ్వారు. 'సరే' అన్నారు. మొదట పిల్లల సినిమాలు ఏమైనా ఉంటాయేమోనని ఆయన చూశారు. ఉన్నాయి కానీ, ఆ టైంలో షో లు లేవు." ఈ సినిమాకు టిక్కెట్లు ఉన్నాయట. వెళ్దామా?" అన్నాడు. " వద్దు తాత. స్కేరీ హౌస్ కి వెళ్దాం" అన్నాడు మనవడు. స్కేరీ హౌస్ లో ఉంటుందో తాత గారికి కొద్దిగా తెలుసు. ఏమో దెయ్యాల కొంప లోని సెట్టింగ్ లు, అరుపులు ఉంటాయని విన్నాడు. " వద్దురా బుజ్జులుా.. భయపడతావు" అన్నాడు వాడి తలను నిమురుతూ. బుజ్జులు నవ్వాడు. " నాకు భయమా తాతా! కెపీసాయి కన్నా నాకే దైర్యం ఎక్కువ" అన్నాడు. కేపీసాయి ఎవర్రా?" అన్నారు తాతగారు. " మా క్లాస్మేట్ తాత. స్ట్రాంగ్ గా ఉంటాడు. కానీ భయం. బాత్రూం వస్తే చీకట్లో ఒక్కడే వెళ్లలేడు తెలుసా? అన్నాడు చిటికెన వేలు చూపిస్తూ. తాతగారు నవ్వారు. 

                           థియేటర్ 'ఎగ్జిట్' డోర్ నుంచి బయటకు రాగానే ఎస్కలేటర్ లో పై ఫ్లోర్ కు వెళ్లారు తాత మనవడు. ఆ ఫ్లోర్ లోనే ఉంది స్కేరీ హౌస్. " రెండు టికెట్లు ఇవ్వు బాబుా" అడిగారు తాతగారు. కౌంటర్ లో ఉన్న కుర్రాడు టిక్కెట్లు ఇవ్వబోతుా, తాతగారి పక్కన మనవడిని చూసి ఆగిపోయాడు. " పిల్లలకు నో ఎంట్రీ అండి" అన్నాడు. మనుమడు భయంగా చూశాడు. 'లోపలికి ఫోనివ్వనంటాడా ఏంటి!' అన్న భయం అది. " పర్లేదు ఇవ్వు బాబు.. నేనున్నాగా" అన్నారు తాతగారు. " లేదండి.. పిల్లలు భయపడితే మాకు మాటోస్తుంది." అన్నాడు కౌంటర్ లోని కుర్రాడు. " పదరా బుజ్జులుా.. పిల్లల్ని ఫోనివ్వరట" అన్నారు తాతగారు మనవడి చేయి పట్టుకొని. మనవడు ఆ కౌంటర్లోని కుర్రాడి వైపు కోపంగా చూశాడు. " నా చావు నేను చస్తా. నీకెందుకు" అన్నాడు! ఆ మాటకు తాతగారు, కౌంటర్లోని అబ్బాయి.. ఇద్దరూ ఒకేసారి పెద్దగా నవ్వారు. స్కేరీ హౌస్ లోకి వెళ్ళుతుండగా తాతగారు అడిగారు.. " ఆ డైలాగ్ నీకు కూడా నచ్చిందా?" అని. ఏ డైలాగ్ తాత అన్నట్లు చూసాడు మనవడు. తాత గారు చెప్పారు. " ఓ.. అదా తాతా..! ఆ డైలాగ్ నాకు సినిమా చూడక ముందే తెలుసు" అన్నాడు మనవడు. " ఎలా?" అన్నారు తాతగారు ఆశ్చర్యంగా నటిస్తూ. " ఎప్పుడు.. డాడీ, మమ్మీ అంటుంటారు తాతా.." అన్నాడు. తాతగారు నవ్వుకున్నారు. పాడు పడినట్లు ఉన్న ఆ చీకటి గుయ్యారం లో తాతా మనవుడు నల్లగా తడుముకుంటూ నడుస్తున్నారు. తాతగారు ఊహించినదానికంటే భయంకరంగా ఉంది స్కేరీ హౌస్! అడుగుకో దెయ్యం వచ్చి మీద పడబోతుంది అలా పడబోతున్నప్పుడల్లా లోపల ఉన్న వాళ్లంతా భయంతో పెద్దగా అరుస్తున్నారు. ఓ చోట కాళ్ళ కిందనుంచి దెయ్యం ఒకటి తాతామనవళ్ల మీదకు రాబోయింది. తాతగారు అదిరిపడ్డారు. 

                           కానీ మనవడు నవ్వాడు! ఇంకోచోట అస్తిపంజరం కిందకు జారి, వీళ్ళ తలమీద ఊగింది. అప్పుడు కూడా మనవడు నవ్వాడు. మరో మూల.. కొరివి దెయ్యం గుర్రున చూస్తుంది. మళ్లీ మనవడి నవ్వు! దెయ్యాలు, భూతాలు రకరకాలుగా భయపెడుతుంటే మనవడు రకరకాలుగా నవ్వుతున్నాడు. నవ్వుతూనే వాడు బయటికి వచ్చేశాడు. వెనకే తాతగారు. తాతగారి మీదకే బతుకు జీవుడా అనుకుంటూ మిగతావాళ్లు. " భయం వెయ్యలేదురా.. బుజ్జులుా నీకు?" అన్నాడు తాతగారు అదురుతున్న గుండెలతో. " లేదు తాతా.. మస్త్ మజా వచ్చింది. అన్నాడు వాడు. ఆ రాత్రి కూడా మనవడు తాత గారి దగ్గరే పడుకున్నాడు. కూతురి దగ్గరకి హైదరాబాద్ వచ్చే రెండు రోజులు అయింది ఆయన. అల్లుడిని చూసి కూడా రెండు రోజులు అవుతుంది! తను ఊరు నుంచి వచ్చిన రోజు మాత్రం.. " బాగున్నారా మావయ్యా" అని అతడు అడిగినట్లు గుర్తు. " బాగున్నాను బాబు" అనేలోపే అతడు బండి స్టార్ట్ చేసుకుని వెళ్ళిపోయాడు. అది కూడా గుర్తు. తాతా-మనవడు ఇద్దరు ఒక నిద్ర తీశాక.. మధ్యరాత్రిలో ఏదో చప్పుడైంది. మనవడు మేల్కొన్నాడు. " భయమేస్తుంది తాతా" అన్నాడు.. ముఖాన్ని తాత డొక్కలోకి దూర్చేస్తూ. అందుకేరా ఆ దెయ్యాల కొంప కు వద్దంది.. అనబోయి, ఇప్పుడు దాన్ని గుర్తు చేయడం ఎందుకని, మనవడి మీద చెయ్యి వేసారు తాతగారు. " తాతా.. రేపే కదా నువ్వు ఊరికి వెళ్ళిపోయేది" అన్నాడు మనవడు బెంగగా. " మళ్ళీ వస్తాను కదరా బుజ్జులుా" అన్నారు తాతగారు మురిపెంగా. " పోవద్దు తాతా. నువ్వు ఇక్కడే ఉండిపో తాతా.. నువ్వంటే నాకు భయం వేయదు తాతా" అంటున్నాడు వాడు. 

                         అలా అంటూనే నిద్రలోకి జారుకున్నాడు. స్కేరీ హౌస్ లో దెయ్యంచూసి పడి పడి నవ్విన వాడికి భయమేంటి?! మనవడి కాలు, చెయ్యి ఆయన మీద ఉన్నాయి. వాడి నిద్ర పాడకూడదని ఎటూ కదలకుండా అలాగే ఉండిపోయారు ఆయన. ఊరు వెళ్లిన తర్వాత కూతురికి ఫోన్ చేశారు తాతగారు. " మీ ఇంట్లో రెండు దెయ్యాలు ఉన్నాయి. ఆ దెయ్యాలు పోట్లాడుకుంటూ.. గిన్నెలు, చెంచాలు ఎత్తేస్తుంటే నా మనవడి భయంతో వణికిపోతున్నాడు. ఎలాగైనా మీ భార్యాభర్తలే ఆ దెయ్యాలకు సర్దిచెప్పి, ఇంట్లోంచి తరిమేయాలి" అని చెప్పారు.