లోక విరుద్ధం

                         " దెయ్యాలు పాత ఇళ్లల్లోనే ఎందుకు ఉండాలి?! కొత్తగా కట్టిన ఇళ్లల్లో ఉండాలని వాటికి ఉండదా?" పెద్దగా నవ్వి అన్నాడు వినోద్. వీచిక కూడా నవ్వింది. అయితే అది నవ్వొచ్చి నవ్వడం కాదు. వినోద్ నవ్వాడని నవ్వింది. ఆవలింత లకు ఉన్న గుణమే నవ్వుకి, భయానికి ఉంటుంది.. అంటుకోవడం! అలాంటి నవ్వు కావచ్చది. ఆరోజు ఉదయమే వాళ్లు ఆ ఇంట్లోకి వచ్చారు. కొత్తగా పెళ్లైన వాళ్ళు, కొత్తగా కట్టిన ఇంట్లోకి, కొత్తగా వచ్చి చేరారు. కొత్తగా రావడం అంటే.. కాళ్ల పారాణి ఆరకముందే ఇటు వచ్చేయడం కాదు. అప్పటివరకు ఉన్న ఇంటిని ఖాళీ చేసి, ఆ ఇంట్లోకి వచ్చి చేరారు. పెద్దగా సామాను లేదు. ఇల్లు మాత్రం పెద్దది. ఓనరు కూడా పెద్దాయన. ఆయన ఒక్కరే ఉంటారు. పక్క పోర్షన్ లోనే ఉంటారు. వీళ్ళున్న పోర్షన్ కొత్తగా కట్టింది. పెద్దాయన ఉన్నది పాతది. ఆ పాత ఇంటి కంటే కూడా పాత మనిషి ఆయన. ఓ డబ్భై ఏళ్ళు ఉంటాయి. తెల్లగా ఉంటారు. తెల్లటి పైజమా లాల్చీ వేసుకుని ఉంటారు. కొత్త ఇంట్లోకి ఆయనే షిఫ్ట్ అయ్యి, పాత ఇంటినే ఈ దంపతులకు ఇవ్వచ్చు ఇవ్వలేదు.' ఎందుకలా?' అని వీళ్ళు అడగలేదు. " హైదరాబాదులో ఇంత తక్కువ అద్దెకు ఇలాంటి ఇల్లు దొరకడం నీ అదృష్టం." అని చెప్పి వెళ్లిపోయాడు, ఆ ఇంటిని చూపించిన అతను. నిజమే అనిపించింది వినోద్ కి, వీచికకు. " నిజానికి రెంటు కూడా నాకు అక్కరలేదు. మంచివే అయినా, లోక విరుద్ధంగా కొన్ని పనులను చేయలేం. 

                         రెంటు లేకుండా మీకు ఇవ్వచ్చు కానీ అది లోక విరుద్ధం. రెండు లేకుండా నా ఇంట్లో ఉండడం మీకు లోకవిరుద్ధంగానే అనిపించవచ్చు. పద్ధతులు శుభ్రంగా ఉండటం నాకు ముఖ్యం. రెంటు కాదు." అన్నారు పెద్దాయన. వీళ్ళిద్దరూ ఆశ్చర్యపోయారు." ఇల్లు నచ్చింది. మంచి రోజు చూసుకొని వచ్చి చేరతాం". అని చెప్పి.. మెట్లు దిగారు. రోడ్డు మీదకు రాగానే.. " ఆయన మనకు ఇంటిని రెంటుకు ఇచ్చినట్లుగా లేదు. మన ఇంటిని చూసుకోవడానికి ఆయనకి మనం జీతం ఇస్తున్నట్లుగా ఉంది." అన్నాడు వినోద్ నవ్వుతూ. వీచిక మాట్లాడలేదు. " వినోద్.. పర్లేదంటావా?" అంది, అతడి చేయి పట్టుకొని. 'ఏంటి పర్లేదా?' అన్నట్లు చూసాడు వినోద్. " కొత్తగా కట్టిన ఇంట్లో.. అలాంటివేమీ ఉండవు కదా?" " ఎందుకలా అనిపిస్తుంది!" అన్నాడు వినోద్. " అంత పెద్ద ఇంటికి రెంట్ ఇంత తక్కువగా ఉంటేనుా! పైగా.. రెంట్ తీసుకోకపోవడం లోక విరుద్ధం కాబట్టే ఆమాత్రం రెంట్ అయినా అడగవలసివస్తుంది అని కూడా ఆయన అన్నారు.." అంది వీచిక. వినోద్ మాట్లాడలేదు. రోడ్డు దాటే ధ్యాసలో ఉన్నాడు. రోడ్డు దాటాక, ఇద్దరూ ఒకసారి వెనక్కితిరిగి ఆ కొత్త ఇంటి వైపు చూశారు. తెల్లటి బట్టలు ఉన్న ఆ పెద్దాయన ఇంటి బయటకు వచ్చి నిలబడి, వీళ్ళనే చూస్తూ ఉండటం కనిపించింది. " ఆయన్నలా చూస్తుంటే ఆ ఇంట్లో ఏమీ లేవని నాకు అనిపించడం లేదు" అన్నాడు వినోద్ నవ్వుతూ. వీచిక మళ్లీ అతడి చేయని గట్టిగా పట్టుకుంది. " బాల్కనీలోంచి ఏదో చప్పుడు వినిపించింది వినోద్" అంది భయంగా వీచిక. అదిగో అప్పుడే అన్నాడు వినోద్ పెద్దగా నవ్వుతూ.. "దెయ్యాలు పాత ఇళ్లలోనే ఎందుకుండాలి?! కొత్తగా కట్టిన ఇళ్లల్లో ఉండాలని వాటికి ఉండదా?" అని. ఆ ఇంట్లో వారికది ఫస్ట్ డే. ఇంట్లోని గదులు విశాలంగా, కంఫర్ట్ గా ఉన్నాయి. ఉన్న ఒకటీ అరా సామాను హాల్లో ఓ మూలకు ఉంది. కిచెన్ మాత్రం రెడీ చేసుకున్నారు..." గృహప్రవేశం" రోజే బయట తినడం ఎందుకని. రాత్రికి కూడా సరిపోయేలా మధ్యాహ్నమే వండేసింది వీచిక. స్నానం అయ్యాక ఇద్దరూ భోజనానికి కూర్చున్నారు. భోజనం అయ్యాక వినోద్ కి చెప్పింది వీచిక.." పగలు వేసినట్లే.. రాత్రుళ్లు జోకులు వెయ్యకు వినోద్. నాకు భయం" అని. 

                             తెల్లారి లేవగానే వినోద్ ముఖం అలజడిగా ఉండటం గమనించింది వీచిక. " ఏంటలా ఉన్నారు?" అని అడిగింది.. టీ కప్పు అందిస్తూ. " ఏం లేదు" అన్నాడు వీచికనే చూస్తూ. తేటగా, అందంగా ఉంది ఆమె ముఖం. అక్కడినుంచి నేరుగా ఇంటి ఓనర్ దగ్గరికి వెళ్లాడు వినోద్. " మీకేమైనా కనిపించాయా కొత్తింట్లో? నిజం చెప్పండి" అన్నాడు స్ర్టయిట్ గా. " నీకేమైనా అనిపించిందా?" అన్నాడు పెద్దాయన! " అనిపించడం ఏమిటి! కనిపిస్తేనుా.." అన్నాడు వినోద్ భయంగా. పెద్దాయన నవ్వారు." నా మనవరాలికి నచ్చని పనేదో చేసి ఉంటావ్. చూద్దాం పద" అని, వినోద్ తో పాటు కొత్త ఇంట్లోకి వచ్చారు. " ఇదిగో.. రాత్రి స్నానం చేసాక, ఒళ్ళు తుడుచుకుని ఈ తడి టవల్ నీ తలుపు మీద కుప్పగా వేసినట్లు ఉన్నావ్" అన్నారు పెద్దాయన. " వేస్తే?" అన్నాడు వినోద్.. పెద్దాయన్ని కళ్ళప్పగించి చూస్తూ. " చెప్పాను కదా.. నా మనవరాలికి ఇలాంటివి నచ్చవని" అన్నారు పెద్దాయన. వినోద్ బిగుసుకుపోయాడు. " మీ మనవరాలు...?" అంటూ ఆగిపోయాడు. " యు.ఎస్. లో ఉంది. తనే ప్లాన్ పంపి ఈ ఇంటిని కట్టించుకుంది.' పద్ధతిగా ఉండే వాళ్ళేవరికైనా రెంటికివ్వు తాతయ్యా 'అని చెప్పి వెళ్ళింది. రాత్రి నీకు జరిగినదాన్ని బట్టి చూస్తే.. తన మనసంతా ఈ ఇంటిపైనే ఉన్నట్లుంది" అన్నారు పెద్దాయన. వినోద్ మరింత బిగుసుకుపోయాడు. " ఏంటి.. రాత్రి జరగడం? అంటూ వచ్చింది వీచిక.. పెద్దాయనకు టి అందిస్తూ. భార్యనే చూస్తున్నాడు.. వినోద్. తేటగా, అందంగా ఉంది ఆమె ముఖం. వినోద్ నమ్మలేకపోతున్నాడు! పెద్దాయన మనవరాలు వీచిక లోకి ప్రవేశించిందా? బతికున్నవారికి కూడా ఆత్మలుంటాయా?!.